O Concello de Boiro aumentou a asistencia aos maiores dende que se iniciou a pandemia de COVID-19, unha medida de choque que se dirixiu a mitigar as graves consecuencias que desencadeou a crise sanitaria nos eidos sociais máis vulnerábeis. En termos concretos, ao longo da emerxencia sanitaria tramitáronse dende o Servizo de Axuda no Fogar (SAF) até 14 servizos, tanto de novas altas como de incremento de horas.
Pola natureza dos servizos, un número importante dos mesmos tiveron relación co cese de actividade do Centro de Día de Boiro, novamente por mor do Estado de Alarma. Entre os servizos demandados hai tamén usuarios e usuarias que solicitaron, durante este tempo, aumentar as horas diarias nas que se lles achega cobertura asistencial. A maior parte das altas son por unha ou dúas horas diarias de luns a domingo.
Desde a Concellería de Política Social lembran que se está a traballar, xunto coas demais entidades sociais do municipio e con todos os medios dispoñíbeis, “para facer fronte á xestión da crise producida pola pandemia de COVID-19 en materia de servizos sociais”.