As cacharelas nos Areos (A Pobra) non estarán finalmente permitidas

Ante a situación de rebrote que se deu estes días na nosa Comarca e co obxectivo de achegar situacións seguras para esta festividade de San Xoán, o Concello de Pobra do Caramiñal vén de tomar a decisión de non dar continuidade ao bando no que no aproba a resolución que autorizaba as cacharelas na praia dos Areos.

Como lembraremos, os días pasados o Concello da Pobra confirmou que ía permitir a celebración da dita festividade no devandito areal urbano, baixo estritas medidas de seguridade e cun exhaustivo operativo no que estaba previsto que participasen (informando, vixiando e incluso paralizando a celebración se fose preciso) a Policía Local e a Agrupación de Voluntarios/as de Protección Civil. Agora, se ben as autoridades sanitarias informan de que o novo episodio (que afectou a oito persoas residentes en Ribeira e unha na Pobra) está controlado e de que se coñecen os contactos que tiveron as persoas contaxiadas (que se manteñen en corentena e baixo), o Goberno local tomou a decisión de non permitir as cacharelas nos Areos porque “non é posíbel ter a seguridade absoluta de que ningún caso escapou ao devandito control”.

No novo comunicado do Concello, o Goberno local lembra que si que se vai permitir organizar actos de celebración a nivel privado pero failles saber ás persoas que organicen e participen nestas actividades “que cumpran estritamente coa normativa sanitaria, que non permitan infraccións e que, no caso de ter nenos ao seu cargo, procedan a sensibilizalos sobre o problema vixente e actúen con responsabilidade”.

O Concello tamén expresa o eu apoio ás familias afectadas por estes novos contaxios, desexándolles que se recuperen “o antes posíbel”.