Abertas as inscricións para a VI Carreira pola Diversidade que organiza a Asociación Ambar

Xa están abertas as inscricións para a VI Carreira pola Diversidade que organiza a Asociación Ambar das Persoas con Diversidade Funcional, sendo este o seu sexto ano consecutivo. A proba terá lugar o domingo 19 de xullo do 2020. Nesta ocasión dada a situación de alarma sanitaria, a carreira realizarase de maneira individual.
A “Carreira pola diversidade” desenvólvese coa intención de servir de inspiración a todas as persoas con diversidade funcional que ven limitada a práctica deportiva na súa comunidade, creando coa axuda de todos os participantes, un catálogo de rutas con valoracións da accesibilidade, nas que poidan practicar a carreira popular no seu concello.
A diferencia dos anos anteriores, cada deportista realizará a proba na súa propia vila, elixindo a ruta de 5 km que prefira, e remitíndoa posteriormente á organización cunha valoración da accesibilidade percibida segundo os criterios de valoración indicados pola entidade. O reto nesta edición consistirá en rexistrar circuítos accesibles para a práctica
deportiva ao aire libre en todos os concellos de Galicia e outros fóra dela, polo que non se dará relevancia aos tempos de execución senón á accesibilidade e calidade dos mesmos.
As probas darán comezo as 10:00h da mañá, e poderán desenvolverse ao longo de todo o día. As persoas participantes deberán subir unha foto ao iniciar o percorrido na súa conta de Facebook, e etiquetar á Asociación Ambar. Ao longo das vindeiras semanas Ambar colgará nas súas redes sociais e páxina web información e recomendacións para levar a cabo a carreira. Ante calquera dúbida pódese consultar o regulamento da carreira.
Esta carreira que superou os 300 participantes na súas edicións anteriores, quere seguir sendo un exemplo de deporte inclusivo dentro e fóra da comarca.

Asociación Ambar das Persoas con Diversidade Funcional
Lg de Granxa, 5 – San Roque, 15967 Ribeira (A Coruña)

981 875 475 |607 356 550

Inscricións
A inscrición poderá facerse en Galitiming sendo a data límite o día 17 de Xullo ás 23:59 horas.
Ademais, nesta mesma páxina web, existe a posibilidade de facer a inscrición do “Dorsal 0” e colaborar de maneira solidaria neste evento.
A cota de inscrición é de 5 € e a recadación será destinada á adquisición de material para a prevención do contaxio por COVID-19, para as persoas con diversidade intelectual.
As modalidades de inscrición son as seguintes:
 Modalidade 5.000 m Zapatilla
 Modalidade 5.000 m Hand Bike.
 Modalidade 5.000 m Cadeira de atletismo.
 Modalidade andaina (menos de 5.000 m)
Sobre a Carreira pola diversidade
A Carreira da Diversidade, empezou a súa andaina na Barbanza no ano 2015, convertendo a nosa comarca nun referente a nivel galego. A proba supuxo todo un avance por tratarse dunha competición deportiva de carácter inclusivo, pioneira na comarca e segunda en toda Galicia, na que puideron participar as e os deportistas nas modalidades de “Hand Bike” e “Cadeira de atletismo”, excluídas na maioría das probas autonómicas.
Ata ese intre, as únicas probas deportivas que incluían a deportistas con mobilidade reducida foran as realizadas na cidade de A Coruña e Lalín. A Carreira da Diversidade superou a participación de persoas con diversidade funcional destas dúas probas, poñendo a esta carreira á cabeza de probas deportivas inclusivas. Ademais este evento contou coa participación de deportistas paralímpicos e de elite como Mila López Vernet, Álvaro Illobre,
José Manuel de la Iglesia. Así mesmo para a promoción da Carreira nas diferentes edicións contamos co respaldo de grandes atletas e deportistas recoñecidos como Fabián Roncero,Jesús de la Osa, Fernando Romay, Killian Jornet, Marta Arce, Sabela Pensado e Carlos Brión.