Prosegue, paseniño e coas lóxicas e naturais medidas de seguridade e control, a volta á actividade dos servizos dos nosos concellos. En Rianxo, as seareiras e os seareiros dos deportes acuáticos terán unha boa nova o 22 de xuño, coa apertura do complexo da Piscina Municipal e a reactivación de todas as zonas deportivas, incluída a zona de augas.
Días antes, o 17, abrirase a canle para realizar consultas (sobre información da propia piscina e as súas medidas de seguridade, sobre os trámites administrativos do abono) a través do correo electrónico e o teléfono específico do centro. Dende a piscina, a xerencia sinala que conxuntamente co Servizo Municipal de Deportes están a implantar os novos protocolos de seguridade e hixiene que farán que “o gym sexa un espazo seguro e que as experiencias deportivas sexa as mesmas de sempre”.
Estas son algunhas das medidas aplicadas.
✅ Hixiene e limpeza reforzada.
✅ Renovación constante de aire e desinfección continua de filtros.
✅ Reforzo de desinfección en auga de piscina.
✅ Desinfección de material e maquinaria.
✅ Garantía distancia mínima.
✅ Múltiples estacións de desinfección.
✅ Horario preferente para maiores de 65 anos.
✅ Control de aforo a través de reserva de clases en app.
A cidadanía poderá consultar todas as medidas de hixiene e seguridade na web de Aquafit, a firma que xestiona o complexo. A concesionaria engade que do 22 ao 30 de xuño o acceso será gratuíto para todos os usuarios que non se deron de baixa durante o peche. Amais, na cota de xullo vanse descontar os días de marzo non gozados.
