O vindeiro 3 de xullo, ás 21.00 horas, temos unha cita coa música clásica en Porto do Son. O motivo? A celebración do Festival de Clausura da Escola Municipal de Música, que se celebra na Casa da Cultura da devandita localidade e que inclúe un recital de piano.
Segundo confirmou o Concello, organizador da cita cultural, as entradas xa se poden reservar online. Porase a disposición do público un número reducido de prazas, co fin de manter as medidas de seguridade necesarias. De feito, será obrigatorio o uso de máscara. O recital, para as persoas que non consigan praza ou para quen queiran “asistir” ao concerto en calquera intre e dende calquera lugar, será retransmitido polo Youtube.
