Os Premios Youtubeir@s, organizados polos servizos de normalización lingüística de varios concellos entre os que se atopa Rianxo, das universidades galegas e da Deputación da Coruña, lanzan a súa cuarta edición con cambios significativos nas súas bases e un incremento da súa dotación económica, que pasa dos 6.500 € de 2019 a 7.500 € para repartir nas doce categorías do certame neste ano. Tal como publicamos en O Barbanza o prazo de inscrición abreuse o pasado 27 de maio rematará o 23 de outubro.
Unha das novidades desta cuarta edición de Youtubeir@s é a reorganización e ampliación das diferentes categorías. Se en 2019 o certame estaba dividido en oito galardóns, para este 2020 contémplanse doce diferentes. Así, o concurso contará cos seguintes premios: canle, vídeo, youtubeir@, calidade lingüística, impacto, calidade técnica, comunicación, creatividade, musical, didáctico, pioneiro e premio do público. Os tres primeiros acompañaranse cunha dotación económica de 1.000 euros, mentres que os nove restantes chegarán aos 500 euros. En total, Youtubeir@s repartirá entre as persoas gañadoras 7.500 euros.
