A asociación ribeirense Renacer vén de emitir un comunicado para clarificar conceptos en relación á información aparecida nas redes sobre as supostas propiedades positivas do alcol en relación coa COVID-19, unha información falsa que non fai máis que incrementar os riscos fronte a pandemia e, tamén, incrementar o consumo da dita bebida entre a poboación. Segundo explica Renacer, polas canles de información empregadas sobre todo pola xuventude están a circular noticias erróneas sobre as propiedades saudábeis e sanitarias do consumo de alcol, destacando o seu suposto potencial para destruír o virus no sangue e máis no aire respirado (con bebidas de alta graduación) e, tamén, para estimular a inmunidade e a resistencia.
A realidade é outra ben diferente, lembran dende a organización, xa que aparte dos moitos prexuízos graves para a nosa saúde que carrexan este tipo de produtos, o alcol aumenta de xeito considerábel o risco do Síndrome de Dificultade Respiratoria Aguda (SDRA), unha das complicacións máis graves da COVID-19. Ademais, non mata o virus no aire inhalado; nin se desinfecta a boca nin a gorxa; nin tampouco se obterá protección algunha contra o coronavirus. “Todas as bebidas alcohólicas de alta e baixa graduación son nocivas para o noso sistema inmunitario; polo tanto en ningún momento van estimular a nosa inmunidade”, explican dende a organización, reflectindo datos da Organización Mundial da Saúde (OMS).
