A Rede ferve estes días de audiovisual especialmente indicado para tempos de confinamento e desescalada progresiva, pero se cadra poucos tan oportunos como o documental Rianxo con boa letra, un achegamento á industria e ao tecido produtivo do concello que se estreo en streaming este pasado 2 de maio e que podemos ver no YouTube, onde foi quen de amorear un importante número de reproducións (preto de 2.700 no dito servizo web), e as que veñan.
Trátase dunha peza audiovisual onde todos os elementos están dispostos para recordarnos a importancia de apostar polo local e polas iniciativas de proximidade, lanzadas polos nosos veciños e veciñas. Unha fórmula anti-crise que se pode extrapolar perfectamente á realidade de calquera dos concellos de Barbanza.
O documental veu da man da Produtora Xurdir, que adoptou a fórmula de estrealo en streaming dada a imposibilidade de facelo cunha presentación presencial, no Auditorio Municipal e coas bancadas ateigadas.
En palabras da produtora, “trátase dun documental dirixido a pór en valor o traballo das empresarias e empresarios de Rianxo, un traballo que hoxe máis que nunca merece ser recoñecido”.
Rianxo con boa letra, froito de intensos meses de traballo e unha exhaustiva investigación da realidade social e económica do concello, foi presentado durante este actual tempo de crise para “mandar unha mensaxe de esperanza e lembra que temos moito futuro por diante”, sinalou Adolfo Muíños, alcalde de Rianxo, durante a sesión en streaming deste sábado.
