O Castro da Cidá é un tesouro cuxos moitos valores foron só desvelados e divulgados en parte. Continuar co traballo de posta en valor do xacemento é un dos grandes obxectivos do Concello de Ribeira en materia de cultura, patrimonio e investigación, de aí que adxudicara de xeito provisional a escavación da muralla do recito superior do castro. Será a terceira intervención arqueolóxica no cumio do Monte da Cidá, onde se atopa un milenario asentamento fortificado de gran valor cultural, etnográfico, histórico e, tamén, turístico.
Segundo a clasificación aprobada este xoves 7 de maio, a actuación recae na empresa Terra Arqueos, S.L., e comporta un investimento de 177.386 euros, IVE incluído, co-financiados pola Axencia Galega de Desenvolvemento Rural da Consellería do Medio Rural da Xunta de Galicia, segundo a resolución sobre a concesión dunha subvención ao abeiro da medida LEADER do PDR de Galicia 2014-2020 que xestiona a asociación Deloa.
O Concello recalcou que o castro era un emprazamento moi ben protexido, de aí a súa situación (no cumio dun outeiro que ofrece vistas panorámicas da contorna, tanto de terra como do mar) e de aí a súa complexa disposición. Así, de acordo coas investigacións levadas a cabo, o Castro da Cidá posuía tres liñas de defensa formadas por dúas murallas terraplenadas exteriores e, na parte máis próxima ás cabanas, por un terraplén rematado en parapeto circundando a plataforma superior ou croa. A intervención focalizarase neste último parapeto, nun espazo de aproximadamente 304 metros cadrados, cunha lonxitude aproximada de 53 metros e entre 5 e 6 metros de anchura.
O Concello engadiu qu ademais da “escavación propiamente dita”, a actuación inclúe “a restauración e consolidación desta área e activación dun plan de divulgación e posta en valor que comezará dende o mesmo momento en que se inicie o traballo de campo, con visitas durante toda a intervención nas que o equipo arqueolóxico atenderá as inquietudes que se propoñan”.
Os traballos teñen unha duración de dous meses
Facendo un algo de historia das actuacións levadas a cabo, o Goberno local lembra que as primeiras escavacións fixéronse entre abril e outubro de 2014 ao abeiro do primeiro proxecto Ribeira Atlántica, que estivo co-financiado con fondos europeos FEDER e que, “partindo dun descoñecemento case total do que había soterrado”, fixeron abrollar restos dun castro “en moi bo estado”, con 15 cabanas vinculadas á Idade de Ferro e unha caseta-vixía adscrita ao século XVIII.
En datas semellantes do 2015 levouse a cabo unha segunda fase, desta vez sufragada con fondos LEADER xestionados por Deloa, e sacáronse á luz as plantas doutras sete cabanas de granito das que se consolidaron cinco, amén de pequenos muros segmentados e a presenza de indicios da muralla-parapeto obxecto da presente intervención.
A día de hoxe tan só está intervido e estudado un 5% da extensión total do xacemento do Castro da Cidá, datada na Idade de Ferro e cunha superficie estimada de 21.620 metros cadrados.
