As obras de rehabilitación do Pazo de Goiáns de Boiro, unha das grandes xoias arquitectónicas galegas da arquitectura civil, avanzan a bo ritmo, reducíndose os prazos inicialmente previstos pola empresa adxudicataria. Segundo informou o Concello a través do alcalde, José Ramón Romero, o bo ritmo é extensíbel a todos os traballos que se están a realizar, dende as tarefas de limpeza até a estabilización e recuperación das fachadas do inmóbel, que “xa se realizaron nun terzo do pazo”, indicou o rexedor, quen visitou este xoves a finca de Goiáns xunto co arquitecto municipal, Emilio Piña, e o arqueólogo municipal, Víctor Barbeito, para ver a evolución das obras.
Segundo fixeron saber, o obxectivo é que, “para cando comece a vindeira tempada de choivas”, o edificio estea protexido para poder realizar os acabados interiores, as instalacións ou a carpintería.
O Concello engadiu que se rematou tamén a división da zona técnica, un espazo duns 25 metros cadrados onde se van situar os aseos e o control das instalacións do inmóbel, como electricidade, climatización e calefacción. Respecto dos materiais usados, o teito deste espazo vai “formigonado”, xa que debe cumprir uns requisitos específicos de seguridade no caso de lume ou emerxencia. Polo que atinxe ao resto dos teitos e chans, vanse realizar en madeira, tratada especificamente para mellorar o seu comportamento ao lume.
As actuacións roldan o millón de euros e o prazo de execución da obra está previsto para que estea rematada no vindeiro verán. O obxectivo é converter o pazo e a súa contorna exterior nun “espazo amplo, diáfano e versátil e que se poidan acoller nel diversas actividades como exposicións ou eventos”.