O Concello de Boiro retoma este martes o mercadiño semanal que se deixou de celebrar polo Estado de Alarma producido polo COVID-19. As restricións da fase 2 do Plan de transición cara a nova normalidade indican que se poden celebrar cun terzo dos postos e controlando o aforo.
O proceso de desescalada, indicado polo goberno central, permite agora
celebrar os mercados ambulantes cun terzo do aforo e dando prioridade aos postos de alimentación. Mentres dure a segunda fase so se instalarán no
mercado semanal dos martes de Boiro os postos de alimentación, froitas e
plantas e a colocación farase de xeito que se cumpran as medidas de distancia mínima entre postos.
Os operarios municipais farán as desinfeccións da zona antes de facer a
montaxe dos postos e o espazo controlarase con presenza policial para que
non se fagan aglomeracións e se respecten as medidas de distancia e
seguridade marcadas polas autoridades.
Desde o Concello de Boiro pídese a todos os usuarios e usuarias do
mercado que respecten as medidas de seguridade, distancia e de hixiene que indican as autoridades sanitarias.
