A xestión da cultura, tendo en conta a necesidade reformular fórmulas que pon en xogo a crise sanitaria, é un camiño cheo de desafíos. Sobre esta base e co obxectivo de ir confeccionando colectivamente mapas e follas de ruta para o novo país cultural que quedará despois da pandemia, vaise organizar este 14 de maio unha mesa redonda na que terá parte activa o Concello de Boiro a través do técnico de Cultura e membro da Comisión, Alberto García. A mesa Onde estamos? Cara a onde camiñar? xirará arredor da xestión e as políticas culturais e os seus principais retos.
Virá da man do Consello da Cultura e nela tamén participarán Marcos Lorenzo, técnico de culta en Ferrol, Juan Antonio Seara, técnico de Cultura en Allariz, e Pilar Portela, presidenta da AGPXC e directora- xerenta do Pazo de Congresos e Exposicións de Pontevedra.
A primeira sesión deste ciclo en liña vaise poder ver a partir do 14 de maio pola tarde na web do Consello da Cultura Galega e nela vaise facer unha diagnose inicial e primeira aproximación aos retos e inquedanzas da xestión e políticas culturais municipais en Galicia.
A segunda das sesións, que será o 21 de maio, centrarase na reflexión de especialistas doutros territorios para trasladalas á realidade galega e, na última das sesións, que será o 28 de maio, vanse abordar unha serie de estratexias e ferramentas de actuación.
Segundo lembran os organizadores, “o sector cultural foi un dos primeiros en paralizar a súa actividade debido á crise da COVID-19”, o que fixo que moitos sectores e disciplinas teñan activados espazos de xeración de ideas para o futuro do sector cultural, tanto público como privado.
A primeira das sesións deste ciclo, na que estará representado o Concello de Boiro, vaise centrar nos retos e inquedanzas na xestión cultural municipal, centrándose nas diversas realidades e enfoques de traballo que existen en Galicia.
