O Concello de Boiro, a través o departamento de Servizos Sociais, puxo en marcha un servizo para pór remedio á situación de illamento e desamparo na que viven, especialmente nestes tempos de Estado de Alarma, as persoas maiores que viven soas. A iniciativa, que fai seguimento das súas principais necesidades e demandas (emprestándolles información sobre os servizos de atención e axuda postos en marcha polo Concello), xa está plenamente activa, con chamadas de seguimento do persoal de Servizos Sociais a todas as veciñas e veciños de Boiro que viven sen compaña e teñen máis de 65 anos.
Os traballadores van facer estas comunicacións de xeito periódico estas semanas para manter “un contacto constante e facer un control pormenorizado do estado destas persoas”, saber se teñen ou precisan algún tipo de asistencia e informalas, tamén, dos recursos locais dos que poden beneficiarse.
O obxectivo destas roldas de comunicación e atención é “detectar posíbeis casos de veciñas e veciños que non dispoñen de asistencia e precisan de axuda para facer a compra ou se lle leven alimentos ou medicinas”, informou o Concello, engadindo que se busca tamén informalos da existencia do Servizo de Asistencia para Persoas Vulnerables, co que se achegan produtos de primeira necesidade a través das entidades locais de Cáritas e Cruz Vermella.
