A agrupación Rianxo en Común que coordina Julián Bustelo vén de impulsar unha iniciativa para facilitar o día a día da xente durante o Estado de Alarma, en relación aos servizos dos que poden botar man a nivel local e os sitios onde poden seguir facendo as súas compras e adquirir bens de primeira necesidade. Máis en detalle, trátase dunha páxina web na que se lle ofrece á veciñanza de Rianxo “información actualizada acotío sobre os comercios que fican abertos, o servizo que dan e os horarios que teñen”. Podemos vela en comerciorianxeiro.gal.
A páxina foise materializando dende o inicio da alarma pola pandemia, collendo corpo a través dun formulario pendurado nas redes sociais por medio do cal os diferentes comerciantes foron enviando a información requirida. O obxectivo de Rianxo en Común foi “dar un paso máis para que os datos estean máis accesíbeis e doados de actualizar”. A páxina inclúe un formulario para ir completando a información con detalles útiles de máis establecementos.
Segundo informou a agrupación cidadá que coordina Julián Bustelo, a intención é que a web siga activa cando a situación se normalice: “Co remate da crise, pretendemos incluír tamén os comercios que vaian abrindo, convertendo a web nun escaparate virtual do comercio local rianxeiro, con datos pormenorizados, imaxes e ofertas”. A páxina será obxecto das modificacións precisas para dotala de máis posibilidades, “tanto para os comerciantes que queren figurar nela como para a veciñanza e os visitantes”.