O Xulgado de Instrución número 2 de Ribeira, en funcións de garda, condenou hoxe unha muller ao pagamento dunha multa de 480 euros como autora dun delito de desobediencia. A xuíza tivo en conta á hora de ditar a pena, coa que se mostrou conforme a sospeitosa, a agravante de reincidencia. A muller, que xa fora condenada o pasado 24 de marzo ao aboamento dunha multa de 240 euros por saír á vía pública durante o estado de alarma sen xustificación, volveu ser interceptada por axentes onte, 8 de abril, nun supermercado de Ribeira cando increpaba e molestaba aos clientes. Ese mesmo día saíu á rúa sen xustificación. Ademais, segundo a sentenza, estivo o 6 de abril nuns soportais, incumprindo a orde de confinamento. A xuíza indica na resolución que “non consta” que a acusada teña “traballo coñecido” e considera acreditada a súa dependencia ás drogas.
Un veciño da Pobra tamén aceptou hoxe pagar unha multa de 720 euros por cometer un delito continuado de desobediencia. A xuíza, que tivo en conta a agravante de reincidencia, sinala na resolución que o sospeitoso, a pesar de ser “plenamente consciente das prohibicións á liberdade de circulación” foi localizado por axentes na Pobra do Caramiñal en cinco ocasións, unha delas mentres pescaba. O condenado, segundo a sentenza, é drogodependente, carece de arraigamento e o seu modo de vida é o furtivismo. Ademais, ten numerosos antecedentes policiais.
