O Xulgado de Instrución número 2 de Ribeira sentenciou hoxe a seis meses e vinte días de cárcere por incumprir o confinamento a un veciño da Pobra do Caramiñal ao que xa condenaron polo mesmo delito o pasado 31 de marzo. Entón multárono con 720 euros por saltarse a norma derivada do estado de alarma ata en once ocasións. A pesar diso, volveu saír á vía pública “sen xustificación algunha” e en seis días interceptárono os axentes ata nove veces, tres delas o 31 de marzo, o mesmo día da primeira condena. O acusado mostrouse conforme coa sentenza, polo que non a recorrerá.
A xuíza emitiu un auto no que rexeita a suspensión da pena de prisión e, polo tanto, ordena o ingreso no cárcere do sospeitoso. “Tal e como consta na sentenza ditada no día de hoxe, o condenado continuou cun total desprezo ás obrigas de confinamentos ditadas polas autoridades estatais”, destaca no auto, no que tamén fai referencia ao traslado de varias dilixencias de investigación relativas a presuntos roubos con forza nas que o condenado está investigado, aínda que non o puxeron a disposición xudicial por eses feitos.
O Xulgado de Instrución número 2 de Ribeira tamén condenou hoxe a seis meses de prisión a un veciño da Pobra do Caramiñal como autor dun delito de desobediencia grave. O acusado recoñeceu os feitos e mostrouse conforme coa pena, do mesmo xeito que a Fiscalía, polo que non recorrerán a sentenza. A xuíza emitiu un auto no que decretou que non hai motivo para a suspensión da pena de cárcere, polo que ordenou o seu ingreso inmediato en prisión. A titular do Xulgado de Instrución número 2 de Ribeira basea a súa decisión “na reiteración na actitude de desobediencia grave, a pesar das graves circunstancias sanitarias” e nos “múltiples antecedentes penais” do sospeitoso.
O condenado, segundo consta na resolución, ten “perfecto coñecemento das limitacións á liberdade de circulación das persoas” derivadas do estado de alarma. A pesar diso, saíu á vía pública “sen xustificación algunha” en quince ocasións, entre o 17 de marzo e o 7 de abril, todas as cales os axentes o interceptaron e advertiron. O 7 de abril tamén o detiveron como presunto autor de tres delitos de roubo con forza e hoxe pasou a disposición xudicial. Os feitos están a instruíse.
