O Concello de Pobra do Caramiñal segue adiante coa súa iniciativa de visitas virtuais diarias ao Museo Valle-Inclán, da man dos diferentes artistas que ao longo do tempo retrataron ao autor de Luces de Bohemia, un escritor que, como lembraremos, foi veciño ilustre da vila caramiñá. O obxectivo do Concello e dos responsábeis do Museo é mitigar con cultura, arte e literatura o confinamento das familias nos seus fogares durante o Estado de Alarma, ao tempo que se contribúe, dixitalmente, a situar A Pobra no mundo. Quen queira seguir de preto as visitas pode facelo a través da web do Concello, onde se nos dá conta de cada actividade diaria. A experiencia deste luns (a número XX) foi unha viaxe virtual á contribución valle-inclanesca de Moyá del Pino, e a deste martes achegounos á obra de Domingo Regueira (unha aproximación ao universo das Comedias Bárbaras).
A iniciativa, como lembraremos púxose en marcha en marzo con feitura de experiencias diarias coleccionábeis dirixidas a enxalzar a obra e a vida do autor de Divinas Palabras. A intención é que mentres dure a actual situación sanitaria, cada xornada se abra a colección patrimonial para ofrecer unha escolma dos fondos do Museo, converténdose así nunha pinacoteca virtual para un público non presencial. As persoas interesadas poden seguir as publicacións a través do Facebook de Turismo A Pobra do Caramiñal e, como dixemos, da páxina web www.apobra.gal.
