O alcalde de Boiro, José Ramón Romero, e o concelleiro de Comercio e Industria, Marcos Fajardo, mantiveron este mércores 8 de abril unha xuntanza por videoconferencia con membros da ABE, a Asociación Boirense de Empresarios, co fin de establecer as vindeiras liñas a seguir no seu labor conxunto contra a crise sanitaria e os seus efectos no tecido produtivo local. Por parte da entidade estiveron presentes o presidente, Daniel García, o vicepresidente, Javier Caamaño, o vocal de hostalaría, Cristian Lago, e o xerente, Tomas Estévez.
O obxectivo específico da xuntanza, que se repetirá de xeito periódico, foi comunicar ao empresariado as novidades da situación do Estado de Alarma e as iniciativas nas que está a traballar a Administración local, por exemplo a posta en marcha de fórmulas que mitiguen as perdas económicas que produce a paralización empresarial, especialmente graves nos eidos da hostalería e o comercio.
Estas mesas de traballo teñen tamén como finalidade escoitar as dubidas e preocupacións dos empresarios e buscar unha solución conxunta.
O alcalde informou aos membros da ABE do contacto e dos vencellos que o Concello ten con outras administracións para aplicar as devanditas medidas de apoio ao tecido produtivo.
Pola súa banda, os comerciantes e empresarios de Boiro mostraron ao alcalde e ao concelleiro a súa preocupación no referente á vindeira tempada de verán, a época de maior afluencia de xente no municipio, e cuxa actividade, sinalaron, “preséntase este ano ben diferente”. Desde a asociación propoñen que se traballe de maneira conxunta en medidas e propostas de dinamización de cara á época estival para recuperar a actividade económica unha vez se levante o confinamento.
