O persoal do Centro de Información á Muller (CIM) de Boiro participou este xoves 22 de abril nunha xuntanza telemática co vicepresidente da Xunta, Alfonso Rueda, a secretaria xeral de Igualdade, Susana L. Abella, e as directoras dos Centros de Información á Muller de Monforte de Lemos, Curtis, Bueu. Santa Águeda, Terra de Outes e Mondoñedo. O motivo da reunión foi “facer unha valoración da situación das mulleres confinadas durante o Estado de Alarma”.
Na xuntanza as técnicas mostraron como se están a desenvolver os servizos de atención ás mulleres nos CIM “nesta situación de excepcionalidade polo Estado de Alarma” e trasladaron a Rueda e a Abella as principais demandas das mulleres que acoden a este servizo.
A sesión abeirouse á liña de comunicación cos Centros de Información á Muller que mantén o Goberno autonómico para “reforzar a atención ás vítimas de violencia de xénero”.
Entre outras cuestións, as persoas encargadas dos centros reflectiron a inquedanza das usuarias dos mesmos polo futuro laboral que lles agarda, con posíbeis perdas masivas de postos de traballo, cuestión pola que solicitaron datos concretos sobre o cobro da axuda mínima vital ou os prazos de solicitudes de axudas.
O Concello de Boiro, trala xuntanza, lembrou que todos os CIM seguen a prestar servizo durante o Estado de Alarma por COVID-19. O persoal do CIM de Boiro segue a traballar para todas aquelas mulleres que o precisen a través do teléfono 981 849 960 ext. 1250, do enderezo electrónico directoracim@boiro.org ou a través de Whatsapp no móbil 669 58 26 74.
