O Concello de Boiro vén de facer balance da repercusión que está tendo o seu servizo de asistencia habilitado co inicio do Estado de Alarma polo departamento de Servizos Sociais. A iniciativa, que se basea en achegar bens de primeira necesidade (alimentos, medicinas) ás persoas que viven en situación vulnerábel, xa chegou a 52 persoas do termo municipal.
En termos máis concretos, Servizos Sociais realizou á Cruz Vermella un total de 19 derivacións para a entrega de medicinas e Cáritas entregou un total de 33 lotes de alimentos, algúns deles en varias ocasións nun mesmo fogar.
O Concello engadiu que esta semana están pendentes de recibir máis produtos outros 10 veciños.
Nesta iniciativa solidaria colaboraron varios centros educativos (facendo doazóns a Cáritas de produtos que tiñan para os comedores escolares) e máis a asociación cultural Peñas Boiro, que levou a cabo unha campaña de recollida de alimentos nos supermercados do termo municipal.
Desde o departamento de Servizos sociais, coa colaboración da Policía Local, Protección Civil e a Garda Civil, estase contactando coas persoas maiores que viven soas para comprobar que “se atopan ben e se precisan de algunha cousa”, así como facilitarlles todos os medios que teñen á súa disposición. O Concello tamén fornece de asistencia telefónica e os axentes visitan aquelas persoas que non se localizan.
