O Concello de Boiro, a través da Comisión de Seguimento da Evolución do COVID-19, avaliou este martes a situación dos diferentes servizos e departamentos municipais en relación á pandemia e as medidas que se están a tomar para pórlle freo. Na xuntanza, na que participaron o alcalde, o tenente de alcalde, o concelleiro de Comercio, o oficial-xefe da Policía Local, o coordinador de Protección Civil e a coordinadora de Servizos Sociais, analizouse (entre outras cousas) a dispoñibilidade do material de protección.
Segundo se lembrou, a prioridade do Concello con respecto aos equipamentos recibidos nos últimos días (máscaras, luvas, desinfectantes) é “cubrir as necesidades do persoal municipal que está a traballar, con especial incidencia nos operarios que se encargan da recollida de lixo, dos servizos de limpeza e desinfección, da asistencia a persoas en situación vulnerábel, etc”. Este material de protección, engadiuse, estaría tamén a disposición de outros colectivos, xa que os representantes do Goberno local recoñeceron estar en contacto coas autoridades sanitarias e tamén con distintas entidades e asociacións locais para que, no caso de que precisen de algún material, se lle poida facilitar. Nesta semana está organizada xa a distribución de equipamentos a algunhas entidades que o demandaron.
Demandas a Servizos Sociais
Dende o departamento de Servizos Sociais recoñeceron que estes días están a recibir cada vez máis demandas de persoas e familias que precisan do Servizo de Asistencia a Persoas en Situación de Vulnerabilidade, e que neste intre se lle está a dar cobertura ás familias que o solicitaron. Para iso, o persoal de traballo social fai unha valoración previa para ver as necesidades que ten a persoa ou familia en cuestión e poder atendelas acorde coas súas necesidades. Servizos Sociais tamén recordou que está en contacto coas autoridades sanitarias para facer un seguimento de todas aquelas persoas con positivo que están recuperándose nas súas casas.
