A veciñanza de Rianxo puxo a punto un primeiro lote de 2.000 máscaras

Seguimos a falar de voluntariado e solidariedade da nosa xente para facer fronte común contra a pandemia e as súas consecuencias, unha vontade de axudar que se manifesta de moi variadas maneiras, mesmo no desenvolvemento de material sanitario. Os días pasados o Concello de Rianxo recibiu, a través dunha doazón anónima, material para facer unhas 2.000 máscaras de protección contra o COVID-19.

Esta doazón, con todo, non podía ser empregada de boas primeiras porque as máscaras viñan pre-cortadas na parte exterior e máis na interior, polo que cumpría coselas e poñerlles a fita elástica. O labor veciñal de voluntariado non se fixo agardar e, en pouco tempo, xa estaba listo un primeiro lote coas primeiras 2.000 máscaras

Na iniciativa participaron vinte voluntarias e voluntarios. Segundo confirmou o Concello de Rianxo, o equipamento resultante repartirase nos servizos públicos en funcionamento no termo municipal. O Concello agradeceu no seu Facebook a doazón deste primeiro lote e o traballo das primeiras persoas voluntarias: “Agardamos seguir con este traballo xa que se ofreceu colaborar moita xente máis”.