A Policía Local de Rianxo vén de recibir un importante reforzo para a súa actividade, de por si básica para o día a día do concello nunha situación normalizada pero aínda máis relevante nos tempos de crise sanitaria que estamos a vivir, con todo o que isto implica. Segundo informou a Policía Local no seu Facebook, dende este primeiro de abril o corpo xa conta con dous novos axentes auxiliares.
Os axentes foron contratados temporalmente polo Concello de Rianxo e coa súa presenza activa reforzaranse as quendas de servizos. Amais desta incorporación, tamén se fixo saber que durante a tempada de verán están previstas máis incorporacións.
Noutra orde de cousas, lembrar que a Policía Local de Rianxo fixo estes días un balance das actividades realizadas no concello destinadas a facer cumprir o Decreto do Estado de Alarma por mor do COVID-19. Segundo se fixo saber, controlouse dun milleiro de vehículos e identificáronse 232 persoas. Amais, realizáronse 55 denuncias a persoas por circular e permanecer na vía pública sen causa xustificada (destas 55 denuncias algunhas correspóndense a persoas reincidentes).
