O certame creativo galego máis directamente encamiñado a loitar contra o estancamento dos nosos talentos (audiovisuais, monologuistas, musicais, contadores, artísticos, argalleiros) durante o confinamento forzoso por mor do COVID-19, o certame de vídeos Rianxo Streaming Festival, xa comezou a recibir importantes contribucións dende a súa posta en marcha, este mércores 18 de marzo.
Segundo puidemos comprobar esculcando na canle específica de YouTube do festival, o certame colleu altura dende o primeiro intre, coa contribución á Rianxeira de Sabela Galbán Rodríguez, que agasallou aos internautas coa Muiñeira do coronavirus, que xa amorea preto de 800 visitas. O listón seguiu ben alto pouco despois, coa Rianxeira interpretada pola veciñanza de Rianxiño, un audiovisual que xa vai camiño das 2.000 reproducións. Un algo máis tarde seguiron chegando contribucións: a Xota de Mangueiro de Rafael Iglesias e Cando veño da lusada, por Bernal e Aldara, dende O Pazo.
O certame
O Concello de Rianxo quixo pór o seu gran de area para facer que o confinamento da veciñanza fose estes días o máis levadeiro posíbel. Por esta razón, puxo en marcha esta semana un certame de creación de “contidos dixitais contra aburrimento na corentena”, o Rianxo Streaming Festival. O obxectivo é converter en fervedoiro de talento e participación a reclusión forzosa da xente nos seus fogares derivada do estado de alarma para frear o espallamento do andazo de COVID-19.
Co
gallo do festival poderase presentar todo tipo de contribucións
dixitais: música, contos, monólogos, divulgación, etc. Este
material será publicado na canle de YouTube ou compartidos nas
propias redes sociais co cancelo #RXtreaming. “O noso obxectivo non
é outro que combater o aburrimento e fomentar a creatividade, ao
tempo que reforzar o sentimento de pertenza a unha comunidade veciñal
tan activa como a rianxeira”, explican dende o Concello, debullando
os pasos para participar no certame.
