The Agapornis, o grupo gaditano que rende homenaxe (e renova) o rock e o funk de sabor máis clásico (o da época dourada do vinilo que para moitos de nós coincide cos lustros comprendidos entre mediados dos sesenta e mediados dos oitenta), vai estar este venres 6 de marzo en Boiro, na Pousada da Galiza Imaxinaria que rexenta o hostaleiro local Suso Santamaría, para ofrecer aos seareiros un concerto que é un compendio dos seus principais sinais de identidade.
Presentarán a edición en vinilo de Forty years late, o seu recente EP lanzado en dez polgadas, unha obra creativa que xorde directamente das máis fondas e completas experiencias dos integrantes da banda co rock da era dourada, aquel que viña da man de bandas como Deep Purple, Black Sabbath, Led Zeppelin, Neil Young and Crazy Horse ou Creedance Clearwater Revival. O título da obra, Forty years late, alude precisamente á sensación compartida polos músicos de The Agapornis de ter nacido, dada a súa paixón por todo o que aconteceu musicalmente a cabo dos sesenta e dos setenta, corenta anos máis tarde do que deberan.
