Ribeira e Boiro están entre os concellos que van participar na segunda edición da campaña Únete ao reto, lanzada pola Consellería de Medio Ambiente e Ecoembes para fomentar a reciclaxe de envases lixeiros (os que introducimos no contedor amarelo). Amais dos ditos municipios da nosa comarca, a iniciativa tamén chegará a unha ducia de concellos máis. A campaña, presentada este luns 9 de marzo en Lalín, consiste nun desafío para acadar a máxima participación e as mellores cifras locais en materia de reciclaxe. Desenvolverase ao longo de tres meses con diversas accións de “impacto na rúa”. O obxectivo concreto: aumentar en polo menos un 10% o que se deposita nos contedores amarelos (envases de plástico, latas e bricks).
A iniciativa comezará a desenvolverse este mesmo mércores e prolongarase ata o vindeiro 11 de xuño nos 15 concellos participantes.
Concretamente, Únete ao reto chegará nesta segunda edición aos municipios de Ourense, Ferrol, Arteixo, Carballo, Ribeira, Ponteareas, Lalín, O Porriño, Boiro, Teo, A Estrada, Sanxenxo, Tui, Viveiro e Cambados, que suman en total unha poboación de preto de 450.000 habitantes.
Para cumprir co obxectivo de incrementar nun 10% as súas actuais cifras de recollida de envases, están programadas “unha serie de actuacións a pé de rúa coas que se buscará comprometer á cidadanía e animala a implicarse e participar activamente na mellora das taxas de reciclaxe de envases lixeiros nos seus respectivos concellos”, explicou a titular de Medio Ambiente, engadindo que a idea básica é “apostar por accións innovadoras e rechamantes entre as que figuran a instalación temporal de contedores xigantes en lugares públicos e visíbeis, a mobilización de patrullas de promotores ou a realización de impresións con auga e pintura de leite no pavimento de graffitis ecolóxicos, unha técnica que permite que a pintura desapareza ao cabo dunhas semanas”.
De maneira complementaria a todas estas actividades, a mensaxe tamén se reforzará cunha campaña de comunicación pensada sobre todo para redes sociais coa intención de chegar ao público máis novo, e co reparto de merchandising.
Durante a pasada edición de Únete ao reto, que se levou a cabo no ano 2018 e no que tamén participaran Ribeira e Boiro, 10 dos 15 concellos galegos participantes cumpriron o seu obxectivo e incrementaron en máis dun 10% as taxas de reciclaxe no contedor amarelo.
