Os partidos galegos coinciden en aprazar as eleccións

O presidente da Xunta, Alberto Núñez Feijóo, e as principais forzas políticas coinciden en que as eleccións galegas convocadas para o 5 de abril teñen que ser aprazadas debido á situación sanitaria, sen ter concretado unhas novas datas para volver celebrarse.

Feijóo manifestou que “para min hai xa motivos desde hai días e, polo tanto, para min estaban desconvocadas desde hai varios días e algunha semana”, faltando só executar o proceso formalmente.

Agora toca adoptar dúas decisións: en primeiro lugar, deixar sen efecto as eleccións autonómicas convocadas e, en segundo lugar, reactivar os comicios de acordo cunha normativa que se está construíndo e que se porá a disposición dos partidos políticos para a súa avaliación e para o seu coñecemento explícito, tamén axuntando un informe de asesoría xurídica xeral para coñecer e avaliar ese texto. Así mesmo, o presidente da Xunta afirmou que se comprometeu a que, unha vez ese texto se remita aos grupos, envialo á Xunta Electoral antes de aprobar definitivamente a suspensión ou deixar sen efecto a data do 5 de abril e reactivar o período electoral de acordo coas condicións dun proxecto de decreto que aprobaría o goberno de Galicia.