O grupo provincial popular da Deputación da Coruña, a través da súa voceira, Rosa Gallego, propón unha reunión urxente ao presidente da institución, Valentín González Formoso, para a implantación dun paquete de medidas económicas de estímulo para axudar aos 93 municipios da provincia a adoptar os pasos necesarios para a prevención do COVID-19.
Unhas achegas que, segundo explicou Gallego, “permitirían sufragar calquera necesidade” que, dentro da autonomía local, estimen necesarias os Concellos para afrontar esta situación ocasionada pola pandemia. Entre elas figura a posta en marcha dun servizo de consulta telemática ou a través dunha liña telefónica habilitada para que durante as 24 horas do día se poida resolver calquera situación ou dúbida que puidesen expoñer os alcaldes e alcaldesas da provincia.
Tamén apostan pola aprobación dun paquete de medidas que poderán ser complementarias coas que anuncie o Goberno central -dirixidas a PEME, autónomos e familias- para facer fronte ás consecuencias económicas provocadas polas medidas adoptadas para evitar a propagación do coronavirus.
Así mesmo, a popular manifestou que “a Deputación debe estar ao lado dos municipios e dos veciños da nosa provincia, e proporcionar os medios necesarios para que poidan adoptar medidas que paren a propagación do virus entre a poboación.”
Nesta liña, incidiu no papel “fundamental” que a institución provincial debe desempeñar para concienciar á sociedade en que “non estamos vivindo unhas vacacións e que, polo tanto, debemos saír da casa só para o estritamente necesario.”
Concluíu apuntando que “a Deputación da Coruña ten a capacidade económica suficiente e está saneada, polo que vemos necesario e ineludible que poña os seus recursos ao servizo dos veciños.”
