O Centro Cultural Lustres Rivas dará cabida do 13 de marzo ao 25 de abril a unha nova exposición titulada Reflexos da Costa da Morte. Esta mostra do artista aguiñense Manuel Ayaso atópase formada por setenta gravados a punta seca.
A inauguración terá lugar o venres 13, ás 20.30 horas. Cada asistente recibirá un coidado catálogo elaborado expresamente para esta exposición coa que se quere exhibir o talento dun dos máis insignes artistas da bisbarra.
Cómpre lembrar que o primeiro evento celebrado no Lustres Rivas tras a súa compra por parte do Concello de Ribeira fora a presentación, en novembro de 2012, dun libro editado pola Deputación da Coruña dedicado ao legado e a traxectoria do aguiñense, quen veu en decembro de 2018 como o centro de cultura da localidade que o veu nacer era bautizada co seu nome.
As visitas poden realizarse de luns a venres, en horario de 10.00 a 14.00 e de 19.00 a 21.00 horas, así como os sábados, de 11.00 a 14.00 e de 19.00 a 21.00 horas. A entrada é libre e gratuíta.