A presentación da peregrinaxe por etapas do Camiño de Santiago do Barbanza efectuouse o venres 6 en Corrubedo e, en menos de 48 horas, xa se completou o número de inscritos.
Desde a Asociación Amigos do Camiño de Santiago do Barbanza. A Orixe expresan o seu agradecemento polo interese e participación. Ademais, piden desculpas a todas aquelas persoas que están intentando anotarse, pero que “por cuestións de permisos oficiais, seguros e de loxística, non podemos ampliar o límite que tiñamos previsto de cen persoas”, tal e como manifesta o presidente da referida entidade, Manuel Mariño Nin.
A peregrinaxe está dividida en 5 etapas e desenvolverase ao longo do mes de marzo e abril. A primeira terá lugar o 15 de marzo, polo que as persoas participantes deberán estar ás 08.30 horas na Igrexa do Xobre, na Pobra do Caramiñal, desde onde sairán os autobuses con dirección a Corrubedo. A saída está prevista para as 09.00 horas da Igrexa de Corrubedo coa entrega das credenciais necesarias para poder obter a Compostela. A organización tamén facilitará avituallamento. A segunda etapa será o 22 de marzo, contemplando o tramo desde A Pobra do Caramiñal a Neixón; a seguinte realizarase o 29 de marzo desde Neixón a Isorna; a cuarta etapa celebrarase o 18 de abril de Isorna a Padrón; e o último tramo efectuarase o 25 de abril desde Padrón a Santiago.
O xeito de percorrer a primeira etapa da peregrinación será indo os participantes agrupados. Contarase con persoal da organización no inicio, no medio e no final. O ritmo medio establecerase nos 4-5 quilómetros/hora, tendo unha previsión de chegada ao Xobre, en torno ás 16.00 horas. É preciso levar roupa axitada ás condicións meteorolóxicas, así como comida e bebida suficiente para toda a xornada.
