A exposición sobre a ruta xacobea na nosa comarca (As pegadas do Camiño Santiago no Barbanza: A Orixe) que estaba previsto inaugurarse este venres 13 ás 20.00 horas, cancelouse finalmente como medida de seguridade e protección contra o avance do COVID-19. A mostra, que ía ter as portas abertas até o 26 de marzo no Auditorio de Rianxo, é unha exposición itinerante con fotografías e evidencias históricas da ruta xacobea entre Corrubedo e Santiago, organizada pola Asociación Amigos do Camiño de Santiago do Barbanza e comisariada por Antonio González Millán. Amais da inauguración oficial da dita actividade, tamén se apraza até cando a situación se normalice a primeira etapa da peregrinaxe do Camiño de Santiago do Barbanza.
A decisión de adiar esta andaina baséase, en palabras da asociación, “nas recomendacións dos organismos internacionais polo brote de coronavirus, que este mesmo mércores foi declarado pandemia pola Organización Mundial da Saúde”. A respecto destas disposicións, a xuntanza directiva da asociación reuniuse onte e resolveu, “co fin de adiantarse a posíbeis situacións que se poidan provocar a raíz do avance do COVID-19”, adiar o primeiro treito que se ía levar a cabo este domingo 15 de marzo, con saída en Corrubedo en co chegada ao Xobre (A Pobra).
“Estas decisións”, explican dende o seu Facebook os integrantes doa comunidade xacobea comarcal, “tomámolas para evitar maiores contaxios”. Tamén lembran que “cando esta situación cambie, poñerémonos en contacto con todas as persoas inscritas e lle daremos prioridade á súa participación na primeira etapa do Camiño de Santiago do Barbanza e Sar”.
