Boiro pon en marcha un protocolo de actuación para reparar as deficiencias dos centros educativos

Facebook ANPA Loureda

As Concellarías de Obras e Educación de Boiro veñen de poñer en marcha un protocolo de actuación coa finalidade de resolver as deficiencias que presentan os centros educativos do municipio. Unhas accións que a edil de Educación, María Outeiral, lle presentou o mércores á ANPA de Cabo de Cruz nunha asemblea que convocaron para tódolos membros do colectivo coa intención de dar conta das reformas do CEIP Santa María do Castro.

Desde o Concello manifestan que, semanas atrás, a ANPA fixo públicos uns carteis que alertaban do abandono de anos que sufre o colexio crucense, tras os que a dirección do centro recibiu unha solicitude de cita de Xefatura Territorial, a cal tivo lugar o pasado luns entre a administración e a directiva do centro, contando tamén coa asistencia da ANPA. Así, na asemblea do mércores, os directivos da asociación de nais e pais deron conta dos acordos aos que Xefatura Territorial chegara en canto ás reparacións do centro.

Nunha xuntanza previa mantida no mes de decembro entre o Concello de Boiro e Xefatura Territorial, chegarase xa a un acordo de colaboración entre ambas entidades para o arranxo das fiestras, unha actuación que comezou hai dez anos. O acordo acadado naquel momento consistía en que a entidade autonómica se facía cargo do material e a administración local da man de obra, ao entenderse esta intervención de moita relevancia como para asumila unicamente unha parte.

Neste senso, desde o Concello apuntan que levan meses traballando, con persoal propio, para a reparación de tódalas demandas presentada por parte da dirección dos diversos centros en relación ás deficiencias máis urxentes. Na asemblea mantida na tarde do mércores, a concelleira trasladoulle á ANPA os traballos que se están a realizar e as necesidades que presentan tódolos centros debido, segundo afirmou, ao abandono que estes presentaban; ademais de explicar cal é o obxectivo do citado protocolo co que se pretende remediar as deficiencias para garantir un mantemento continuo das instalacións educativas.