O doutor José Ramón González Juanatey, xefe do servizo de Cardioloxía do Hospital Clínico de Santiago e catedrático de Medicina da Universidade de Santiago de Compostela (USC), desprazarase ata Boiro, o mércores 11, para impartir unha conferencia no salón de actos da Casa da Cultura prevista para as 20.30 horas. Así o desvelaron esta mañá o alcalde José Ramón Romero; o presidente de Peñas Boiro AC, Joaquín Riveiro; e outros membros do colectivo.
Baixo o título É posible vivir 100 anos sen problemas de corazón, o coloquio busca que os asistentes reflexionen sobre os hábitos e estilo de vida que se leva na actualidade. Polo de momento, hai 200 persoas inscritas e, desde a referida entidade, están xa traballando para facer novas convocatorias deste tipo.
O acto está promovido pola asociación cultural Peñas Boiro AC e para asistir requírese solicitar invitación no telefono 639354191 ou no enderezo electrónico penhasboiroac@gmail.com.
