Seguindo coas conmemoracións feministas deste 8 de marzo que vimos de deixar atrás, Rianxo reivindica este venres 13 de marzo o labor de loita social, cultural e política despregado polas mulleres galegas na primeira metade do século XX, un labor silenciado pendente de recuperación e recoñecemento. Poñer en valor moitos dos seus nomes é o gran obxectivo do libro Irmandiñas (Laiovento), de Aurora Marco, que se presenta o venres ás 20.30 horas no salón de actos do Auditorio rianxeiro.
No acto, amais da autora, estará presente Adolfo Muíños Sánchez (alcalde de Rianxo), Encarna Pego (profesora e socia de Barbantia) e Xesús Santos (historiador local e socio de Barbantia). Tamén se contará coa actuación de Barahunda e Tero Rodríguez.
O libro Irmandiñas, da escritora e investigadora Aurora Marco (Noguera de Albarracín, Teruel, 1948) é como dixemos unha importante contribución para devolver á luz o legado de mulleres galegas sobranceiras, como por exemplo Ermitas López Verdes, compañeira de Lois Peña Novo, primeiro concelleiro nacionalista e membro significado das Irmandades da Fala e da que, até hai ben pouco, pouco se sabía dela.
Ermitas López, mestra e integrante da sección feminina das Irmandades dende o 1918, é unha das mulleres anónimas que figuran no libro publicado por Laiovento e que se presenta este venres en Rianxo, pero non é a única: hai moitas máis. O labor de investigación da autora (que lle levou catro anos de intenso traballo) levouna a coñecer as importantes contribucións vitais, culturais e sociais de grandes loitadoras como Concepción González Varela e Adela Martínez, ou as rianxeiras Juana Muñiz e Carmen Sende, as dúas de Asados. Ás devanditas cómpre sumar (entre outras moitas) os nomes de Amalia Álvarez Gallego, da Sociedade Polifónica de Pontevedra, viúva de Alexandre Bóveda; ou Elvira Bao, que estivo en Santiago, nos tempos históricos das Irmandades, dando un mitin a carón de Villar Ponte, en igualdade de condicións (e, malia todo, só o nome del acabou figurando nas informacións elaboradas polos medios da época, o dela nunca); ou Celia Bouzas e Mercedes do Campo, precursoras do galeguismo e do feminismo, avanzadas ao seu tempo.