A Mancomunidade de Municipios Arousa Norte reuniuse no mes de febreiro cos responsables dos Departamentos de Deportes e Turismo dos concellos de Ribeira, A Pobra do Caramiñal, Boiro e Rianxo. Unha acción que se replicou esta mesma mañá coa realización dun encontro cos técnicos e técnicas da Área de Cultura dos referidos municipios.
A coordinadora técnica de Arousa Norte, Irene Maneiro, destacou a importancia da realización destas mesas colaborativas ao constituír “un espazo de diálogo necesario para colaborar de xeito directo cos distintos departamentos, co obxectivo de crear sinerxías e estratexias conxuntas de proxectos tanto xa existentes como de futuras accións, apostando por unha difusión conxunta dos valores da nosa comarca.”
O Departamento de Cultura estivo representado por Unai González e Sara García -Ribeira-; Alberto García, Elena Dosil e Manola Ferreirós -Boiro-; Fernando Lavandeira -Rianxo-; e Fita Sanisidro -A Pobra-. Estas mesas técnicas serán complementadas con convocatorias específicas nas que traballar tamén coas distintas Concellerías en función dos criterios e obxectivos marcados nas xuntanzas.
