A asociación AMBAR, entidade de Barbanza para a inclusión social de persoas con diversidades funcionais e doutras características, vén de pór en marcha o seu Servizo de Orientación Laboral, unha iniciativa habilitada ao abeiro do Servizo Público de Emprego de Galicia (do que é colaboradora AMBAR) e que ten obxectivo de mellorar a empregabilidade dos colectivos que representa a asociación e facilitar a súa inclusión no mercado laboral.
AMBAR lembra ás persoas que queiran máis datos sobre o servizo, que poden obtelos chamando ao 981 874 480 ou ben pórse en contacto coa asociación a través da conta de correo orientacion@asociacionambar.org.
Nun plano máis concreto, o servizo subministra aos demandantes de emprego os seguintes recursos e actividades: orientación e asesoramento individual; recursos para a busca activa de emprego e apoio na procura de ofertas; elaboración da carta de presentación, currículo e preparación da entrevista laboral; itinerarios personalizados de inserción e información e solicitudes de cursos e programas formativos; e accións colectivas de orientación para traballar os ámbitos da motivación, o autocoñecemento, as habilidades sociolaborais, as actitudes e as técnicas de busca de emprego.
Ás empresas, o servizo pon o seguinte á súa disposición: información sobre axudas e subvencións; orientación sobre modelos de contratación, bonificacións e redución de cotas á Seguridade Social; análises de postos de traballo e adaptacións de posto, asesoramento para a procura de profesionais; e resolución de dúbidas na inserción laboral.
AMBAR lembra que o seu Servizo Público de Emprego é unha liña de actividade publica e de balde.
