Baixo a organización da Academia Galega de Seguridade Pública da Xunta (AGASP), o municipio de Ribeira albergará o 25 de abril un curso sobre reciclaxe de incendios urbanos e industriais dirixido a agrupacións de voluntariado de Protección Civil pertencentes a varios concellos.
Trátase dunha acción formativa descentralizada que promove a AGASP en territorios distintos á súa sede na Estrada.
Comprende dez horas de duración teórico-práctica e catro módulos, con contidos sobre primeiros auxilios enfocados a este tipo de situacións, prevención de riscos laborais, etcétera. Integrantes do corpo de bombeiros e do GAEM (Grupo de Apoio e Emerxencias Municipal) formarán parte dos docentes do curso.
A intención é celebrar a parte teórica no viveiro de empresas de Ribeira e a práctica nas inmediacións do complexo da Fieiteira.
