Abre a tódolos Concellos a bolsa de contratación de auxiliares de Policía Local

23 Marzo 2020

A Xunta porá a disposición de tódolos Concellos galegos a bolsa de contratación de auxiliares de Policía Local da Academia Galega de Seguridade Pública (AGASP) ante a epidemia de coronavirus. Ata o momento, só estaba a disposición daqueles Concellos que asinaran convenio coa AGASP para a centralización do proceso selectivo de policías locais e auxiliares.

Así, desde hoxe e durante un prazo de cinco días hábiles, poderán acceder á bolsa preferentemente os Concellos que teñen asinado convenio de colaboración, constituíndo un total de 74. En canto remate ese prazo de cinco días, a bolsa abrirase a tódolos Concellos galegos que así o requiran, teñan asinado convenio ou non, para facilitar a cobertura de prazas no caso de que fose necesario ante a actual situación de crise sanitaria e de Estado de alarma.

Ademais de ampliar a listaxe a tódolos Concellos, afirman que tamén se facilitarán os trámites. Deste xeito, para poder facer uso desta listaxe, os Concellos só terán que dirixir a súa petición directamente á AGASP no enderezo formacion.agasp@xunta.gal, indicando na súa solicitude que cumpre os requisitos esixidos para a contratación e comunicando tamén o número de prazas que solicita e o período da contratación. Cómpre lembrar que os Concellos deberán comunicar esta contratación -de facerse efectiva- ao centro de coordinación da Delegación ou Subdelegación de Goberno que corresponda.

A bolsa de auxiliares está composta agora mesmo por unhas 130 persoas. De ser necesario ampliar esta listaxe, a Xunta poderá incluír na mesma a todas aquelas persoas que, tendo superado o proceso selectivo para a categoría de policía local, non obtiveran praza no último proceso selectivo convocado.

Desde a Xunta manifestan que se están a tomar todas estas medidas co obxectivo de facilitar, dentro das súas competencias, a cobertura de prazas de auxiliares de Policía Local daqueles Concellos que poidan precisar cubrilas de forma urxente durante o Estado de alarma.

Así mesmo, o pasado 13 de marzo, e en cumprimento das recomendacións das autoridades sanitarias, a AGASP suspendeu a súa actividade lectiva. Por esta razón, adiantou a parte práctica co curso selectivo da 12ª promoción de policías locais que, polo tanto, foron enviados aos seus Concellos de destino para reforzar a atención durante o Estado de alarma. Son un total de 134 persoas que se distribuíron en 31 Concellos, chegando o pasado 16 de marzo e permanecendo nos mesmos ata o remate desta situación, cando se reanudará a actividade lectiva.

Outros artigos

Publicidade

Revista en papel

Opinión

“Enfermedades terminales”. José Manuel Pena

“Enfermedades terminales”. José Manuel Pena

Estos últimos días las visitas al hospital fueron frecuentes para acompañara un buen amigo que se encuentra viviendo unos difíciles momentos por sudelicado estado de salud. Esta circunstancia me abrió un poco más los ojos ala realidad del sufrimiento, el dolor, el...