Malia que levaban meses programados e malia a expectación que tiñan xerado, A Pousada da Galiza Imaxinaria, seguindo as recomendacións sobre as medidas a tomar para contribuír a frear o avance do COVID-19, vén de emitir no seu Facebook un comunicado no que fai saber a cancelación dos seus concertos e monólogos para a presente tempada, que quedan aprazados á espera de que nas semanas vindeiras a situación se normalice.
O local, botando man do sentido común e tentando saírlle ao paso aos potenciais riscos que pode implicar xuntar mancheas de persoas procedentes de moi diferentes lugares nun lugar pechado, tomou a decisión de pechar as portas “ata que as autoridades sanitarias confirmen que non hai risco para a poboación de contaxios”.
Isto esténdese tamén aos concertos que estaban previstos ao abeiro do ciclo Directos Vibra Mahou en Galicia, entre os que se atopaba a actuación programada na Pousada polos Heredeiros da Crus este sábado 14 de marzo, e que queda cancelada até novo aviso. A promotora fai saber que todas as persoas que dispoñan de entrada para este concerto dos Heredeiros poderá xestionar a devolución a través do servizo Ticketmaster. “Lamentamos vernos obrigados a tomar esta medida pero nestes intres, a prioridade é garantir a saúde e o benestar dos cidadáns e contribuír á contención do virus”, engade a promotora.
