Aínda que non sexa a solución aos nosos problemas e ao sufrimento polo que están a pasar as familias, estando as nenas e nenos entre os máis prexudicados, non hai dúbida de que un boa felicitación de aniversario, feita polos axentes de Policía Local, axuda e moito a sobrelevar a reclusión forzosa do Estado de Alarma. Conscientes disto e co obxectivo de carrexar un pouco de ilusión aos máis pequenos durante o confinamento, os axentes da Policía Local de Boiro uníronse á iniciativa xeral de festexar os aniversarios da rapazada a pé de rúa. Iso si, debido á alta demanda de peticións que están a recibir, os policías centraranse en dar os parabéns aos menores de 12 anos, estes inclusive.
Esta iniciativa, que tamén se está a levar a cabo noutros concellos da comarca, como por exemplo no da Pobra do Caramiñal, busca “alegrar aos máis cativos no dia do seu aniversario e que non o poden celebrar polo confinamento”, segundo explican fontes do Concello, que engaden que a iniciativa das felicitacións in situ dá continuidade ás accións levadas a cabo nas rúas, todos os días ás 20 horas (e na compaña do persoal de Protección Civil, das ambulancias e da veciñanza dende as xanelas das súas casas), para destacar con aplausos o labor despregado polo persoal sanitario e demais profesionais que seguen a prestar os seus servizos no Estado de Alarma.
Volvendo á iniciativa dos parabéns, é preciso que as familias que desexen recibilos se poñan en contacto co Concello, a través do propio Facebook ou do enderezo electrónico con 24 horas de antelación, indicando o enderezo, o nome da persoa que cumpre anos e a idade.
