A Policía Local de Pobra do Caramiñal quere poñer o seu gran de area para facer máis levadío o confinamento das nenas e nenos nos seus fogares, por mor da crise sanitaria e das restricións aplicadas polo Goberno central. Así, para mitigar a reclusión obrigada da rapazada e achegar un pouco de ilusión en días tan monótonos, a Policía Local comprometeuse a felicitar ás nenas e nenos do concello que celebren ao longo destas semanas o seu aniversario. O único requisito que se pide é que sexan menores de 12 anos (12 anos inclusive). Os vehículos policiais achegaranse aos domicilios das pequenas e pequenos para felicitalas/os polo seu cumpreanos.
O horario establecido é de 20:00 a 23:00 horas e só poderá facer se o solicita algún membro da familia. As chamadas deberanse realizar ó teléfono 687 482 835. O compromiso adquírese sen prexuízo de que calquera necesidade do servizo, urxente ou non, impida face-lo desprazamento ata o lugar. No caso de se produciren varias demandas para un só día, a prioridade estabelecerase seguindo a orde estrita en que se reciban as solicitudes.
