A Deputación da Coruña anunciou este luns 30 de marzo que vai fortalecer e ampliar a súa oferta de formación en liña, co fin de dar o mellor servizo posíbel aos concellos e os seus cadros de persoal nestes días de confinamento e restricións, e co obxectivo de contrarrestar a recente suspensión de 65 cursos presenciais (as actividades do seu Plan de Formación Agrupado 2020). Para paliar todas estas circunstancias a entidade provincial adiantou a abril, de forma urxente, os cursos online previstos até fin de ano. O obxectivo: asegurar o dereito á formación dos traballadores e traballadoras das 101 entidades locais que participan no plan e non prexudicar as empresas do sector.
O prazo de inscrición para estes cursos xa está aberto e finalizará o 3 de abril.
Os cursos desta convocatoria extraordinaria que comezarán no mes de abril son os seguintes:
– Réxime xurídico, procedemento e responsabilidade patrimonial das administracións públicas: 40 prazas.
– Ciberseguridade para usuarios: 80 prazas.
– Violencia de xénero: 40 prazas.
– Teoría e práctica da nova Lei de contratos do sector público: 40 prazas.
– LibreOffice: 40 prazas.
– Interpretación do patrimonio e turismo cultural: 40 prazas.
– Xestión de subvencións. Tramitación e control: 40 prazas.
– Deseño de folletos e cartelería con software libre (Scribus): 40 prazas.
– Nóminas e seguros sociais na Administración local: 40 prazas.
En función do número de inscritos/as o número de prazas dalgún dos cursos podería incrementarse.
Para máis información pódese consultar o apartado de formación da web da Deputación.
