A Asociación Boirense de Empresarios (ABE) emitiu este luns 30 de marzo un comunicado coincidindo co endurecemento das medidas de restrición social e empresarial desta semana: unha nova medida do Goberno central para frear o avance imparábel do COVID-19. A asociación lembra que segue a traballar de xeito telemático e atendendo as moitas dúbidas que lle achega o sector respecto das novas medidas relacionadas coa crise sanitaria.
A ABE tamén recorda que segue adiante, malia a complexidade dos tempos de confinamento e restricións que estamos a vivir, traballando nunha manchea de frontes: “Continuamos propoñendo campañas, traballando na mesa de crise do Concello e participando das comisións das patronais galegas e nacionais”.
Atención a socios
Co fin de resolver dúbidas sobre os cambios lexislativos, a ABE está a realizar estes días “un constante labor informativo”, atendendo a ducias de consultas sobre aspectos como os ERTE, a solicitude de prestación, o aprazamentos de impostos, a negociación con provedores, a orde de axudas e, sobre todo, as implicacións das medidas recollidas no decreto de estado de alarma e as posteriores modificacións.
Mesa crise Concello e reunións de directiva
A ABE, trala posta en marcha da mesa de crise do Concello por iniciativa da asociación, mantivo xuntanzas periódicas ao abeiro da comisión abordando aspectos de especial interese como moratorias, redución e eliminación de taxas e impostos municipais que “o Concello de Boiro xa ten sobre a mesa e que nos vindeiros días agardamos se cristalicen en medidas concretas”, explican, engadindo que “xa lle comunicaron ao alcalde a súa disposición para colaborar e axudar en todo o que se poida”. Por outra banda a directiva da ABE estase a reunir por videoconferencia todos os martes e venres para abordar os asuntos derivados desta crise.
Campañas
Este luns 30 de marzo a ABE lanzou unha campaña informativa baixo o lema Que podemos facer? Ao seu abeiro, a asociación boirense vai desenvolver catro bloques temáticos sobre aspectos nos que leva días traballando. Para optimizar os resultados, a entidade solicitou a participación de empresariado, clientes e veciñanza, “comentando aspectos concretos de cada tema”. Hoxe lanzouse o primeiro bloque, un capítulo informativo sobre a mesa de crise que a ABE conseguiu formar xunto co Concello.
A ABE lembra que ten a disposición da cidadanía, para recadar opinións e propostas, o seu correo electrónico info@abe.gal e máis as súas redes sociais.