A agrupación SumaRibeira vén de emitir un comunicado sobre o pleno de Ribeira do 30 de xaneiro, sobre as cuestións tratadas ao seu abeiro e sobre a súa abstención respecto da votación sobre o convenio entre Augas de Galicia e o Concello para a cesión da explotación da EDAR de Ribeira, unha decisión que segundo indica, foi con toda probabilidade “a decisión menos mala de cantas se podían tomar”. Segundo fai saber o grupo que coordina Xurxo Ferrón, o que había que determinar na sesión do 30 de xaneiro “non era se estabamos de acordo co deseño e funcionamento da infraestrutura programada e executada baixo a dirección de ACUAES e financiada nun 70% con fondos europeos nun 30% por Augas de Galicia”, senón que “cumpría decidir sobre o que era competente, que era só se o pleno asumía a xestión das estacións depuradoras”.
SumaRibeira, para clarificar conceptos e posturas, remite no seu comunicado á súa postura previa respecto do funcionamento do sistema de saneamento e depuración, “que sempre expuxemos e seguimos mantendo”. Esta postura resúmese nestes puntos: que se impida que o sistema produza cheirumes e contaminación atmosférica, que se garanta a non intromisión da auga de mar na infraestrutura (por ser fonte de corrosión e de gases), que se modifique o alivio do tanque de tormenta de Areeiros (impedindo o desaugadoiro nun regato que “por mor das mareas e temporais sempre tendeu a estancarse”) e que se impida o transvase de residuos industriais procedentes do Polígono Industrial de Xarás a un sistema deseñado só para residuos urbanos.
SumaRibeira expresa no seu comunicado “a súa total desconformidade coa falla de transparencia e información” con respecto ao desenvolvemento previo da sesión do 30 de xaneiro, unhas eivas “que nos obrigaron a ter que exercer o noso dereito ao voto con maiores inseguridades e con riscos que excederon os mínimos razoábeis, sen motivos suficientes que ao noso entender o xustificasen”.
A agrupación tamén fai fincapé no seu convencemento de que, de formalizarse a xestión en Augas de Galicia e non no Concello, as taxas de saneamento e depuración veríanse incrementadas, polo que “pensamos que pode ser máis eficaz que toda a Infraestrutura sexa responsabilidade dunha soa administración, neste caso a local”. Asemade, SumaRibeira avoga por municipalizar todo o ciclo da auga, cuxa xestión “será máis doada se o Concello asume tamén a responsabilidade das depuradoras”.
