O Sálvora Club de Fútbol vén de pór en marcha unha nova iniciativa solidaria e humanitaria co pobo saharauí, que engadir ás campañas activistas de Ramón Martínez, o presidente da entidade, quen ten envorcado importantes esforzos para pór de manifesto os problemas polos que están a pasar os cidadáns da antiga colonia española. A nova campaña a prol dos saharauís e a súa loita por converterse en pobo libre tamén vén da man de Ramón Martínez, que participará nunha viaxe aos campamentos dos refuxiados ao abeiro da XX Edición do Sahara Maratón, que se celebra o 25 de febreiro. Aproveitando a súa estadía no deserto, o club solicita a colaboración de “todas aquelas persoas que queiran achegar o seu gran de area a esta causa”.
Fontes do Sálvora informan tamén de que desta volta, o presidente irá acompañado polo seu fillo e xogador do club Alexandre. “Nesta ocasión centraremos a nosa recollida en medicinas (paracetamol, ibuprofeno, etc), alimentos (aceite oliva, pasta, atún) e material escolar”, indican dende o club, engadindo que o material pódese entregar desde o día 11 de febreiro ata o día 18 do mesmo mes na Cantina do Campo de Fútbol Sintético da Fieiteira ou na tenda Pódium Sport de Ribeira.
