Na súa visita ao obradoiro de emprego Hostalería Boiro III, o director xeral de Orientación e Promoción Laboral, Pablo Casal, lembrou que mañá, venres 21, pecha o prazo para que os concellos interesados presenten os seus proxectos para acceder ás axudas do novo programa para facilitar a contratación de menores de 30 anos.
Trátase dunha iniciativa que, incluída no Plan galego de formación para o emprego, contará cun investimento de 7 millóns de euros para que as entidades locais poidan desenvolver propostas de formación e aprendizaxe acompañadas dun contrato de traballo en empresas do sector, cunha duración total de 18 meses. Neste senso, agárdase apoiar 20 proxectos e ofrecer 300 prazas para mocidade desempregada.
No que respecta ao referido obradoiro, este conta coa participación dun total de 16 persoas. O alumnado prepárase para a obtención do certificado de profesionalidade de Operacións Básicas de Cociña, de nivel 1, e Operacións Básicas de Restaurante e Bar, tamén de nivel 1; ademais de realizar actuacións relacionadas con estas materias coma a elaboración e presentación de menús sociais, servizos de almorzos saudables e solidarios, comidas degustación, así como a realización de eventos gastronómicos do Concello e de xornadas de showcooking.
Na súa intervención, o director xeral destacou a necesidade de que as distintas administracións e entidades colaboren á hora de deseñar programas que melloren a calidade do emprego en Galicia e subliñou a importancia de apostar por unha formación dual e flexible, que se adapte tanto ás necesidades das empresas como ás demandas de emprego dos concellos galegos.
Pola súa parte, o alcalde de Boiro, José Ramón Romero, expresou o seu agradecemento, agardando seguir contando coa colaboración da Xunta de Galicia co Concello para a formación da mocidade e maiores, contribuíndo a facilitar a súa incorporación ao mundo laboral, pois afirmou que “un pobo onde haxa traballo ten vida.”
