Este luns 10 de febreiro comezaron finalmente as obras de acondicionamento para pór en valor o Edificio das Colonias de praia Xardín, da man do Concello de Boiro. A iniciativa, un dos proxectos do actual equipo de Goberno de José Ramón Romero durante a pasada campaña electoral, ten o obxectivo de outorgar unha nova e relevante vida a outro dos edificios históricos do concello, que se atopaba en desuso, empregado principalmente como acubillo de equipamento municipal, malia o seu gran potencial e o seu emprazamento privilexiado (lindeiro ao paseo costeiro de Barraña e Xardín, a carón mesmo da ría de Arousa). Nos traballos que comezaron este 10 de febreiro, os operarios municipais comezaron a retirar material do inmóbel para proceder posteriormente ao seu acondicionamento integral.
Segundo informou o Concello nun plano máis concretos, as tarefas previas estanse a centrar nunha selección do material co fin de atopar elementos aproveitábel para traballos municipais: mangueiras, tubaxes, motores e ferramenta de traballo.
Asemade, entre os obxectos que foron atopados (e que o Concello sinala que “causaron sorpresa entre os traballadores”) atopábanse tamén obxectos antigos de valor: antigas máquinas de cerámica, unha pesa industrial e mesmo un antigo cinematógrafo doado, presuntamente, por Don Gonzalo, o propietario do que fora o primeiro cinema de Boiro. Estes obxectos trasladaranse a outras instalacións para a súa exposición permanente, informou o Concello, engadindo que o edificio está en perfectas condicións dende o punto de vista estrutural, malia estar en desuso dende hai máis ou menos unha década.
Estes traballos únense ao acondicionamento levado a cabo polos Concellos nas antigas unitarias do municipio, unha liña de actividade común para devolver a vida aos edificios históricos do termo boirense.
A idea do Goberno Local é emprazar na sede das Colonias os centros de operacións das entidades deportivas local. É dicir, acondicionar o edificio “para que os clubs e asociacións poidan ter uns despachos nos que gardar documentación e celebrar reunións”.
Os traballos de revisión eléctrica e limpeza interior remataran, “con condicións favorábeis”, o sábado 22 de febreiro. O Goberno local agarda poder asignar os espazos a partir do 1 de marzo, razón pola que se traballa xa confeccionando unha listaxe de entidades que tiñan solicitadas xa algún tipo de espazo.
