O Concello de Boiro comezou os arranxos da ponte de Ameán, na parroquia de Cures, que foi unha das infraestruturas afectadas polo mal tempo reinante este inverno, xunto co Polideportivo de Santa Baia (que xa está sendo obxecto de reparacións na cuberta e nas fachadas) e outros elementos. A dita ponte de Cures, de feito, foi derrubada polas fortes chuvias da pasada tempada, imposibilitando a óptima comunicación entre Ameán e Cadarnoxo. O prezo da actuación ascende a un total de 9.238 euros e, ademais do arranxo dos danos, vaise reforzar a estrutura da ponte para evitar novos esborrallamentos no futuro.
O Concello lembra que os amaños tiveron que facerse estes días, coa chegada do tempo, por mor do intenso caudal que leva o río, que fixeron imposíbel traballar na zona. O Executivo local engade que ademais da reparación dos danos causados polo temporal, a obra ten “unha dobre funcionalidade”: por unha banda vaise achegar unha base firme, feita con formigón ciclópeo, para a base da ponte, e, pola outra, estase a fornecer á construción dun muro de escollera que afiance o terreo e garanta a estabilidade da ponte e evitar novos derrubes.
