O Concello de Boiro abre este luns 17 o prazo de presentación de solicitudes para a convocatoria dun proceso selectivo dunha praza de docente, quen se encargaría de impartir a acción formativa Servizos de Bar e Cafetería, correspondente ao plan de Accións Formativas para Desempregados (AFD) que se desenvolverá no centro de formación e viveiro de empresas situado no polígono industrial de Espiñeira. Os interesados poderán formular as súas solicitudes ata o venres 28 a través do Rexistro Xeral. As bases e a instancia desta convocatoria poden descargarse da páxina web www.boiro.org ou conseguirse na portaría da Casa Consistorial.
Os cursos AFD están indicados para mozos e mozas desempregados menores de 30 anos. Para participar nesta acción formativa é preciso ter a ESO ou Competencias Clave de nivel 2, inscribíndose a través da Oficina de Emprego.
O de Servizos de Bar e Cafetería iniciarase en marzo e constará de 658 horas, en horario de luns a venres, de 16.00 a 21.00 horas. Esta acción formativa complementa a de Cociña, tamén correspondente ao referido plan AFD, a cal comezou en febreiro. Ademais da formación específica de cada especialidade, o alumnado dispón duns módulos de formación transversal sobre inserción laboral e sensibilización medioambiental, así como formación para a igualdade.