
O alumnado do Obradoiro de Emprego en Hostalería Boiro III organizou na mañá deste venres 28 de febreiro un evento gastronómico ligado á gastronomía típica do Entroido. A cita foi no local multiusos do Mercado Municipal e nela, o alumnado-traballador de Operacións Básicas de Restaurante-Bar serviu cafés e doces típicos destas datas elaborados polos estudantes que cursan a modalidade de Operacións Básicas de Cociña. Houbo filloas, orellas e unha destacada selección de sobremesas, amais de cafés e chocolates. Na degustación participaron numerosos veciños (máis dun cento de persoas, as que se achegaron entre as 11.00 e as 14.00 ao devandito local multiusos).

Como lembraremos, o Obradoiro de Emprego en Hostalería Boiro III comezou no mes de outubro e conta con dúas modalidades, Operacións Básicas de Cociña e Operacións Básicas de Restaurante-Bar, acubillando oito alumnas e alumnos en cada unha das especialidades. Está co-financiado pola Iniciativa de Emprego Xuvenil e o Fondo Social Europeo e promovido polo Concello de Boiro, e emprega, cun contrato para a formación e o aprendizaxe a mozos e mozas de entre 18 e 30 anos de Garantía Xuvenil.